😱*एप्रिल फूल*🤓 १ एप्रिल. आपल्या सुहृदांची हलकेच फसवणूक करून खिल्ली उडवायचा ऑफिशियल दिवस. विजय मल्ल्या, नीरव मोदी सारखे काही महाभाग हा फसवणुकीचा दिवस संपूर्ण वर्षभर दणक्यात साजरा करतात ते जाउ द्या. आपण वयाने काही महिन्यांचेच असताना घरातली वडिलधारी मंडळी आपल्या भोवती गोळा होऊन “आता बाळाला गोग्गोड खाउ द्यायचा बरं का” अशी काहीतरी साखरपेरणी करून, आपण गाफिलपणे “आ” केला की पटकन कडू औषध चाटवतात. हा आपल्या आयुष्यातला पहिला एप्रिल फूल. फसवणुकीची आणि आपली ओळख होते ती इथे जी पुढे आयुष्यभर पुरते. माझ्या कुंडलीत तर एप्रिल फूलचा भरभक्कम योग असावा. छान कपड़े घालून “चला,चौपाटीला जाउया” असं सांगून मला शाळेत घातलं गेलं. हे सरळसरळ एप्रिल फूल होतं. नंतर मीही फ़ारसं न शिकूुन सगळ्यांना एप्रिल फूल केलं तो भाग वेगळा. कॉलेजमधल्या परीक्षांसाठी मी २१ अपेक्षित प्रश्नांवर कॉन्सन्ट्रेट केलं की पेपर मध्ये २१ अनपेक्षित प्रश्न येत असत. एप्रिल फूल काही पाठ सोडायला तयार नव्हतं. चाकरमानी झाल्यावर, गाड़ी प्लेटफॉर्म क्रमांक xx वर येतेय अशी अनाउंसमेंट करून, प्रत्यक्षात पार विरूद्ध दिशेच्या प्लेटफॉर्म वर आणणे हा  रेल्वेकडून सातत्याने केला जाणारा एप्रिल फूल मी अजूनही एंजॉय करतोय. रिकाम्या बसमध्ये आनंदाच्या भरात उड़ी मारून चढल्यावर “गाड़ी डेपोमें जाएगी, नीचे उतरो ” असे कंडक्टरचे प्रेमळ शब्द ऐकु आले की मी ओळखतो, आज एप्रिल फूलचा योग आहे. “आज ‘बाहेर” जेवायचं बरं का” असं ऐकल्यावर आपण बाहेर - हॉटेलात जायची तयारी करावी तर “बाहेर”च्या खोलीत बायको जेवायला वाढते हाही एप्रिल फूलचाच प्रकार. “आज तुमच्यासाठी राईस अँड स्पाईस केलाय” असं म्हणून शिळा फोडणीचा भात वाढणे, “घ्या, तुमच्यासाठी नवीन कपड़े आणल्येत” असं सांगून पुढ्यात फक्त सॉक्स टाकणे असे बारीकसारीक एप्रिल फूल बायको अधूनमधून करतच असते. अकाउंट मध्ये १५ लाख, अच्छे दिन हेही एप्रिल फूलच होतं हे लक्षात आल्यावर मनसोक्त हसलो मी. दुसरं करणार तरी काय म्हणा. एप्रिल फूल खरं तर अगदी बालपणापासून ते थेट आयुष्याच्या अखेरी पर्यंत या ना त्या रुपात आपल्याला भेटतच रहातो. तो हलकाफुलका असेल तर एंजॉय करायचा आणि गंभीर असेल तर त्यातून धड़ा शिकायचा एव्हढं पथ्य पाळलं की मग जगणं सुसह्यच नव्हे तर अगदी सहजसुंदर होऊन जातं असं पुलं नी म्हटलेलं आहेच. बघा, पुलंचं नांव घेतल्यावर तुम्ही मान डोलावलित. हे खरं तर माझं म्हणणं आहे पण आपल्याला विचारतं कोण? सकाळीसकाळी काहीतरी चांगलं वाचायला मिळेल या अपेक्षेने हे च-हाट इथवर वाचल्यावर आपल्याला एप्रिल फूल बनवलं गेलंय असं जर तुम्हाला वाटायला लागलं असेल तर ते खरं आहे. 😉 टेक इट इझी, फार इरिटेट होउ नका. हसून सोडून द्या… आफ्टरऑल आज १ एप्रिल आहे. 😂