🌹*बॅलन्सशीट*🌹 ३१ मार्च. आर्थिक वर्षाचा अखेरचा दिवस. वर्षभरात आपल्या खिशात आले किती, गेले किती आणि खिसा कितपत नरमगरम आहे याचा आज मांडलेला हिशोब म्हणजे बॅलन्सशीट. बँकेतल्या इतक्या वर्षांच्या नोकरीमुळे अगदी अंगवळणी पडलेली ही गोष्ट आज दिवस अखेरी पर्यंत सहजगत्या पार पाडली जाईल. त्यात विशेष काही नाही पण मनात विचार चमकून गेला की असाच या वर्षाचा लेखाजोखा आपल्या वैयक्तिक आयुष्याचा मांडून बघावा का? आणि मांडायचा झाला तर काय बरं तपासावं? चला ताळेबंद मांडून बघुया. आपल्या ज्ञानात भर पाडणारं काही वाचन आपल्या ऍसेट साईडला या वर्षात नव्याने समाविष्ट झालं आहे का? किंवा एखादं कसब, एखादी कला? आहे का असं काही? असेल तर, छान, गुड गोइंग! नकळत एखाद्या दुर्गुणाने आपल्या लायबिलिटीजच्या यादीत शिरकाव तर नाही ना केलेला? हं, हे बारकाईने तपासायला हवं. ऍसेटच्या बाजूला आपण पाळलेली काही नीतीमुल्ये अजून जशीच्या तशीच आहेत ना? यात काही भर पडली असेल तर आनंदाचीच बाब आहे. लायबिलिटीजला असलेला अहंभाव, असलेले पूर्वग्रह दूषित विचार होते तसेच आहेत का? तसं असेल तर हे काळजी करण्यासारखं आहे. पुढच्या वर्षी इथे लक्ष घालायला हवं. सग्यासोयऱ्यांशी असलेले बंध नीट जोपासले गेलेत ना? नवे मित्र जोडले असले तर ऍसेटची बाजू सुदृढ झाली हे नक्की. जुन्या विकारांनी डोके वर काढलेले नाहीये ना आणि नवीन व्याधिंनी लायबिलिटीज वाढवल्या तर नाहियेत ना? तपासून बघुयाच. या वर्षात कुणाच्या चांगल्या कामाचं “ग्रेट! शाब्बास” असं कौतुक केलयं? ऐकलेल्या छानशा गाण्याल्या “क्या बात है!” अशी दाद दिल्येय? कुणाला निरपेक्ष मदत केली आहे? निसर्गरम्य स्थळी जाउन मनमुराद आनंद लुटलाय? असेल तर, ईट्स अ व्हॅल्यू ऑडिशन टू ऍसेट साईड. विनाकारण चीडचीड, कुणाचा पाणउतारा केलाय या वर्षात? लायबिलिटीज मध्ये अशी वाढ नकोच, इथे लक्ष द्यायलाच हवं. जन्मदात्यांच्या, वेळोवेळी आपल्या मदतीला धाऊन आलेल्यांच्या ऋणांची परतफेड नीट होत्येय ना? ही कर्जे अनुत्पादित - एन पी ए होणे केंव्हाही वाईटच. *चला मांडून बघुया हा हिशोब. ऍसेटची बाजू भक्कम असली तर त्यासारखा आनंद नाही. तसं नसेल तरी हरकत नाही, अजून वेळ गेलेली नाही - पुढल्या वर्षी टर्नअराउंड करू शकतोच की.*