भातुकलीच्या खेळामधली राजा आणिक राणी अर्ध्यावरती डाव मोडला, अधुरी एक कहाणी राजा वदला, "मला समजली, शब्दांवाचुन भाषा माझ्या नशिबासवे बोलती तुझ्या हातच्या रेषा" का राणीच्या डोळां तेव्हा दाटुनि आले पाणी ? राणी वदली बघत एकटक दूरदूरचा तारा "उद्या पहाटे दुसऱ्या वाटा, दुज्या गावचा वारा" पण राजाला उशिरा कळली गूढ अटळ ही वाणी तिला विचारी राजा, "का हे जीव असे जोडावे ? का दैवाने फुलण्याआधी फूल असे तोडावे ?" या प्रश्नाला उत्तर नव्हते, राणी केविलवाणी का राणीने मिटले डोळे दूर दूर जाताना ? का राजाचा श्वास कोंडला गीत तिचे गाताना ? वार्‍यावरती विरून गेली एक उदास विराणी गीत - मंगेश पाडगावकर संगीत - यशवंत देव स्वर - अरूण दाते राग - वृंदावनी सारंग ( छायाचित्र : काल्पनिक )