🌹श्रीगुरुपादुकास्तवनदशकम्🌹 विमुक्तिविद्याविनयप्रदाभ्यां, सुरेंद्रकांताकरलालिताभ्याम्। विमोहविक्रोधविपूजिताभ्यां, नतोस्म्यहं सद्गुरुपादुकाभ्याम्।।1 समग्रविज्ञानसुधाश्रयाभ्यां, जगत् समुद्रोत्तरतीरदाभ्याम्। विवेकवैराग्यविकासिकाभ्यां, नतोस्म्यहं सद्गुरुपादुकाभ्याम्।।2 प्रशिष्यशिष्यप्रतिपूजिताभ्यां, समस्तसंदेहनिवारिणीभ्याम्। मतिप्रदाभ्यां प्रगतिप्रदाभ्यां, नतोस्म्यहं सद्गुरुपादुकाभ्याम्।।3 सुदैन्यदारिद्र्यविदारिणीभ्यां, सकामनिष्कामनिरूपिताभ्याम्। मनोविलासादिविवर्जिताभ्यां, नतोस्म्यहं सद्गुरुपादुकाभ्याम्।।4 शमादिसंपत्तिसमाहिताभ्यां, कृपापराभ्यां करुणायिताभ्याम्। कलंकपंकांकविशोधिनीभ्यां, नतोस्म्यहं सद्गुरुपादुकाभ्याम्।।5 समाधिसौख्याश्रयदायिनीभ्यां, मनोविकारस्य कृतेंsतकाभ्याम्। ममत्ववृत्तीभविसिंहनीभ्यां, नतोस्म्यहं सद्गुरुपादुकाभ्याम्।।6 प्रसुप्तविज्ञानविबोधिकाभ्यां, सदैव संतोषसुखावहाभ्याम्। निजांतरात्मप्रतिभासिकाभ्यां, नतोस्म्यहं सद्गुरुपादुकाभ्याम्।।7 हरप्रदाभ्यां च हरिप्रदाभ्यां, शिवाप्रदाभ्यां च शिवत्वदाभ्याम्। प्रपंचजाड्यांधतमोपहाभ्यां, नतोस्म्यहं सद्गुरुपादुकाभ्याम्।।8 अलब्धलाभेन्दुविमंडिताभ्यां, समत्वभावे परिनिष्ठिताभ्याम्। सुधाप्रवाहप्रतिमाकराभ्यां, नतोस्म्यहं सद्गुरुपादुकाभ्याम्।।9 विलक्षणाभ्यां परिचिन्मयाभ्यां, अचिंत्यचिंतापरिपूरिताभ्याम्। विकल्पविभ्रांतिनिवारिणीभ्यां, नतोस्म्यहं सद्गुरुपादुकाभ्याम्।।10 दैन्यदाहप्रशांत्यर्थं, समत्वभाववर्धये। त्र्यंबकरचितं दिव्यं, दशकं गुरुवंदनम्।